單機了兩年Flight Simulator，日前終於膽粗粗咁走入網絡飛行的世界，一探與世界各地玩家互動的模擬飛行，過程有點蝦碌，但總算成功踏出網絡飛行的第一步，非常興奮。
第一次正式連上Vatsim，就遇到特別的事，唔知應該叫好運定係點，今日正正係汶川大地震5周年，大陸Vatsim搞活動，港澳台都有飛友響應帶貨飛投奔成都，飛機流量比我平時「偷窺」所見多左好幾倍。
不過第一次連飛，就無謂參加活動搞亂檔，都係揀返條最熟既香港到台北既航線黎飛。
飛奔成部，暖送四川
其實係今次之前兩日，就已經係vatsim飛過一轉，但非常尷尬的，原本以為兩個地方無空中管制人員上線，就可以隨便飛，實情係要監視通用頻道，同其他玩家用文字協調，就咁乜都冇理就飛左呢轉。更糟糕的係，唔知連線軟件個天氣系統有問題，飛得愈高空氣反而愈熱，又唔熟自己開緊架MD82，架機又設計到好真實，搞到爬升到一半突然燒左一邊引擎，附近重有另一個玩家，可能佢會好奇怪我飛得又低又慢。之後我重唔識死，唔落線繼續航程，臨降落台北時失速左好幾次，當時又要大霧+黃昏+落雨，落到400尺先見到跑道，地面重見到爬左我頭果架747，好在佢一早已經落左地泊好位，而我係手忙腳亂下唔知點解又咁好彩比我安全降落到，驚魂甫定先識得斷線唔阻住地球轉。
言歸正傳，呢兩日搞返清楚d規則、通訊方法之後，就再次挑戰。平時好日都唔見一次香港有空管上線（每次瀏覽vatsim.hk都寫話無空管），一心諗住可以一如以往係無空管既情況下可以用輕鬆點既心情練習，點知頭先所講的「好運」就黎了，唔知係咪大陸既活動關系，呢晚香港竟然有2位空管上左線，打亂晒我既計劃。雖然有空管上線係非常難得的事，可以練習航空對話同有正規引導，更係玩連線飛行既最大樂趣之處，但係我完全無準備過對話，所有對話認識只來自以前玩「我是航空管制官(ATC)」的經驗，毫無信心可以對話，而且上次飛到一團糟，今次有空管既話一飛唔掂可能會引來更大麻煩。正係我猶疑今日試唔試飛之際，我發現香港機場有成四五架機正在升降，當我將頻道轉到塔台的118.40MHz，我驚訝地發現佢地原來用文字溝通，呢刻我見先知原來Vatsim可以單純用文字溝通的。然後我就鼓起勇氣，把握有空管上線呢個機會，展開首次正式連線飛行。
用文字的話可以鸚鵡學舌，參照其他玩家的對話格式對答，唔洗擔心講錯野或唔識答，咁就放心得多。快手快腳咁準備好後推前既工作，整著設備，set好系統同航線，而係呢個時候正好有兩班機準備起飛，並用文字向HKG Center（當時Tower恰好已落線，亦無Delievery同Ground）提交了起飛請求，然後我就照辦煮碗，戰戰競競咁發出第一句對話：「Good evening, CPAXXX at bay N62, request IFR to RCTP as filed」，順帶一提，係發出請求前我已經按規矩將一份flight plan send左上去，所以as filed。
就係我摒息以待Tower回覆之時，佢竟然話「All station concern, HKG CTR is closing, byebye and have a nice flight」，然後就落左線，心都碎埋。
就咁樣，兩位香港的ATC都落線了，有點失望，但又鬆返一口氣。係無空管既情況下，又回復輕鬆得多的自由狀態，將頻道調回通用的122.80，自行滑去07R跑道，然後根據不久之前先知道要留低既一句：「CPAXXX VHHH trf MD82 departing runway 07R, IFR to RCTP」，從跑道起飛，按先前花上我近10分鐘先輸入完入FMC的航線飛行。係我剛剛飛離香港之際，另一位玩家又係頻道上通報要由香港起飛了，然後我發現，原來CPA1XX同IFR to RCTP其實係可以省略的……
連線時最慘既事莫過於無得暫停，起飛降落都係非常複雜的操作，一邊手控住架機，一邊撻機上無數個按扭，尤其無joystick用搞到要用一隻滑鼠做晒咁多野，絕對手忙腳亂，而且突發既事往往都係呢個時候發生，平時單機飛行都習慣不時暫定一下，爭取設定的時間同冷靜落黎應對眼前情況。依加要一take過做晒，真係好大挑戰，好彩今次起飛無大問題。
無驚無險完成離場航線，就係呢個時候雷達發現身後有一架機向同一方向飛近，原來頭先尾隨起飛果架機都係去台北。雖然很高興有其他玩家作伴，不過亦都有一個擔心，呢位同伴開既係747巨無霸，而我呢架只不過係又舊又渺小既MD82，佢既速度快我一截，而且呢一刻大家既航路重疊，真係驚佢一陣會追尾。不過我好快就發現呢個擔心根本多餘，架747一早已經爬得高過我，而且我本身設定的巡航高度低，根據前一日先知既規則，我會係中途轉向飛另一條航路（ELATO），所以唔會相撞。本來想同呢位人兄say個hi，不過精神緊張，而且話咁快就已經飛左一半，然後掛住準備降落就唔記得左。香港飛台北係一條好完美既短途航線，全程只需1個鐘零40分鐘左右，好適合係電腦面前休閒作樂的飛友。
無驚無險完成離場，重有其他玩家同行。
其實係網上雷達見到自己都幾興奮。
離開香港空域，進入台灣境內，享受左短時間的放鬆，突然傳來如雷貫耳的「咚」一聲，嚇到彈起，見到唔知邊度傳黎一句「Please contact TPE_CTR on 126.7」，打破左呢段時光，原來幾分鐘時連台灣的管制員都上線了，真係好腳頭，正係我回憶緊玩ATC時機長係點回應既時候，剛才的係後要既朋友已經回左句「TPE_CTR on your frequency」，認真多謝晒。今次的空管係有耳機的，所以馬上就問我地能否以語音通訊，因為依然唔識講，我都係回返句negative，繼續用文字溝通，真慚愧。
果然，馬上就遇到溝通難題，當美麗的寶島出現係地平線上之際，空管就叫我準備用ILS降落到05R跑道，並改為直飛HUKOU航點。弊了，無背熟航圖，唔知HUKOU係邊，完全唔識回應又唔知點飛，不過原本係電腦set左正規的降落路線，猶疑左一陣就同佢講唔知HUKOU係邊，叫佢帶路。睇黎佢都知道我唔識搞，又知道我原本set既航線都無問題，所以叫我飛返原航線，重好熱心咁教埋我跟住要係咩位下降，咁就定返好多了。對話完結後馬上開返張航圖睇睇，原來HUKOU係ILS 05R的進入點，即係其實叫我直飛向跑道進入點而跳過我原本設定的標準降落航線，摸下摸下終於改正好航道，按原指示進場。
後面的朋友係空管引導下用比較迂迴的方法進場，避免爬我頭降落，而我亦都好順利由27,000呎降到4,000呎，然後交接到另一位上左線既台北塔台，囉埋落地許可。本來見到咁順利都幾雀躍，但惡夢呢個時候先開始。距離機場只有10海哩，但架機重係4,000呎唔落，但我明明set左ILS頻道，應該按Guide slope下降先係，Tower又無提我有問題。猶疑多3個nm，最後係不明所以下改用手控降落，但已經為時已晚，就算我幾努力俯衝，去到跑道前都重有500呎先到地，無奈之下只好重飛。
重飛了，真失敗
通報「Go around」，然後一陣手忙腳亂，被自動導航搞得一團糟，飛機上下亂拋一輪之後先定落黎，將頻道轉回TPE_CTR，讓那位熱心的空管帶我重新降落。係呢個時候我發現降落失敗的問題所在，原來係我錯手將導航頻道錯調成111.07，原本ILS 05R應該用110.70，真失敗。同空管確認返問題，再由佢引導我返跑道後，佢拋下一個祝福，就放我返TPE_TWR。今次ILS 05R的訊號亦已經確認接收正常，而原本係我後面果位朋友已經降落左，毫無憂慮，就連天公都造美，原本係機場附近既雲都忽然唔見晒，非常成功就降落到跑道上。
今次調正ILS，連雲都同我企埋一邊，把握十足
連番感謝台北兩位空管的協助，無佢地都唔知點降落，亦都透過佢地熟習了對話方式，信心大得多了。就係我泊好飛機後，又有兩架唔知幾時出現既747著陸，令機場有點熱鬧氣氛。就係呢個時候，畫面一閃，機場落起雨上黎，真係奇怪。呢個情況令我諗起一個古希臘作家寫過的一句：「偉大戰役之後通常會下大雨。」雖然老老實實呢兩個鐘既經歷一點都唔偉大，再花咁多時間寫呢篇胡說八道既文直頭係幼稚，不過都算係一次嚴峻的挑戰，尚算合格加入模擬飛行員的行列。
順利停泊，尾隨重有兩架747
偉大戰役之後通常會下大雨…
終於跳出以往的獨樂樂，邁向眾樂樂的第一步，往後的飛行體驗相信會完全唔同，樂趣也應該會大得多了。雖然打破了心理障礙，但仍然要多加學習各種規則、熟習航線，重有最重要既對話規範，希望可以飛得更精彩。
青鳥脈博 