茶餐廳

遠不一定差,近不一定好

Posted on

都送左一個月外賣了,去過不少地方,從住宅到寫字樓再到工廈。不要以為送住宅最舒服,其實不是,以下有一個送外賣舒服度首5排名:

1.達貿中心

最中意就係達貿了,無論大堂定走廊都有冷氣,而且溫度適中,更重要係空氣異常清新,榮獲環保處室內良好空氣質素認證,確實當之無愧!另外重有好好風景,令人心曠神怡

2.荃德花園

最近,最快,夠爽

3.科技中心

自己地頭,行得舒服,夠涼,氣味清新

4.嘉力工業中心

環境非常清靜,真係蚊子飛過都聽到,走廊又開闊。雖然遠左些少沿路又曬

5.匯力警衛室

夜晚先有單,路途比較遠,hea時間好地方

倒數5名

5.綸華織造

路比較遠,非常曬,更重要每次都係5個沉重的小菜

4.富華工業大廈

雖然比綸華近一點,但衰在部升降機太慢,氣味難聞,又係曬

3.永南貨倉大廈

好近既一個地方,但點解入尾3?因為部升降機實在太慢,得果一部,成棟大廈重要有廿層,風扇同冷氣都冇,等到發瘟

2.港安醫院、千里台、嘉興大廈

唔洗講都知係條長命斜最辛苦

1.東南工業大廈

真係慘,日日囉住3-5大袋野行成個幾兩個字,日曬兩淋,開頭5-6個餐,然後8個,跟住10個,E+下下都13個,就13盒飯加13杯飲品,又重 個結又細,行到半路手指已經發紫,行多5分鐘既話手指應該廢左。

話說今日出糧,距離notebook已經行左6成路

茶餐廳異聞錄

Posted on

  1. 全職中意幾時返就幾時返,老細求都求唔到佢係指定日子返工,反而兼職一星期要返足7日
  2. 荃運中心停車場有一個規定:「停車留匙,否則以後禁止進場」。停車要留車匙,唔通想比人開你架車走?定係想比偷車賊偷?
  3. 半山街通利琴行格離有個布頭倉庫,送外賣非常麻煩:首先由右邊側門進入,打開鐵門直行進入防煙門,行樓梯上一樓入左個布倉,直行轉右行到盡去到露台,爬上鐵梯到二樓另一個布倉,直行到尾會有一個辦工室,呢個就係目的地了。睇黎d伙記開工都幾煩。
  4. 今日聽聞有工廈比人爆格,不過奇怪既係,被爆格既唔係樓上的寫字樓,而純粹係倉庫。「倉庫邊有野比佢偷嫁?個賊都白痴既」守衛不力的保安大罵道。
  5. 富華的升降機非常奇怪,沒有關門掣,按扭亦沒有燈號,你永遠都不能確定你有沒有按下正確的樓層。
  6. 嘉力的客運大常在假期和夜晚會鎖門,要由停車場進入,這在工廈是正常不過,因為要節省人手。可奇怪的是無論鎖門與否,客運大堂都長期有保安駐守,那你鎖掉這正門有什麼用?麻煩人家嗎?
  7. 有個細路食野一定要食辣,食完無耐係補習中途叫外賣,而且係晚上叫公司三文治,而比錢果個係佢老師,班房只有佢一個,都唔知係咩補習社黎……
  8. 端午節晚茶餐廳唔開門,唔好以為係因為老細做節,而係佢要返大陸
  9. 今日放工返到屋企,坐唔夠10分鐘老細急call我返去,原來超多外賣。中午2個鐘得果3張單,返到去果半個鐘
  10. 一隻最有公德心的流浪狗如廁時必到沙咀道近白田壩街的花圃解決,以免滋擾途人,難怪那裡的植物都如此繁茂……

未來錢

Posted on

今日開工真係特別,份份都送到山卡啦咁遠,綸華又有、匯力又有、裕豐呢d偏僻工廈又有,連超遠既東南都有,日同夜都係咁,真係神奇。更神奇既係,無論去到邊,都總會撞到鴻利既人,去到東南咁遠都會撞到@@

最特別既係,今晚有個細路,一走入黎就話要食辣火腿通,佢阿巴唔比佢食辣就大發脾氣,食完走左一陣又打過黎叫公司三文治,無錯,係夜晚叫公司三文治,更奇既係送去補習社,幫佢比錢果個係佢既老師…

今日重面對了第一次犯錯,做左四日先出錯算係幾好啦。聽電話寫錯地址,最後送果時當然就一鑊粥了。結果呢?我都唔知,好似不了了之最後都冇送了。

講下翠豐,我真係幾憎佢d lift,架架d頭層排佈都唔同,有d門掣係上面,有d係下面,有d數字掣係上至下咁排,有d又下至上咁排,搞到次次都搵餐死。唯一唔錯既,就只係道門,黑鋼制的,幾好睇,後面鏡面可以照鏡。

入返正題,係度做應該都賺到3000-6000個大洋,呢筆錢如果無收歸國有既話可以點用呢?講買野我倒有幾樣想買。有$6000當然買部notebook好,夠實際,以後唔洗爭電腦。另外,買部相機都唔錯,$6000都應該買到部入門級既DSLR,不過我似乎未夠班玩到咁勁,而且我都唔係影得好頻密,其實一部M4/3已經足夠了,更加實際。

如果冇咁多錢,亦可以買個外置硬碟,方便備份,E+電腦入面d垃垃雜雜野已經有幾廿GB,當中圖片幾GB,影片幾廿GB,兩年來既文件、存檔又有幾GB,相都有1GB。有個硬碟點都方便d

有可能換個喇叭同個mon就更好了,對比超低既mon睇片打機都唔多掂,喇叭如果有個2.1靚聲d就好了

其實呢d野又唔係好必要既,都係諗下姐

從前,我付錢給它;現在,他付錢給我

Posted on

兩年半來,我都係某茶餐廳的常客,一個月20個上課天,最少15個都係去果度食,貢獻的錢就不少了

現在,情況轉變了,變為老闆要比返錢我,因為我成為佢既僱員了,真係可笑

而且,待遇都唔錯。$25/hr,每日中午返2個鐘,夜晚返2個鐘,包兩餐,咁岩呢4個鐘又係我最得閒既時間,中間相隔4個鐘可以返屋企用下電腦,都算係唔錯,只係成個月人工都係得大約$3000姐。

不過,有一樣都幾唔抵,今日上網見到一份更好的,係附近做database管理員,撞正自己果飯,$23-31/hr,一星期5日,11點到6點,只求中五學歷,可暑期工,如果做到就真係太好了。可惜都係度做左幾日了,邊好意思走,唯有算了。

茶餐廳既功夫真係有辦眼見,送下外賣,抹下台,執下野,咁就兩個鐘,冇乜特別難度,係有時幫手接待客人比較麻煩,自己唔係好清楚鋪頭既野。老細都好關照,始終都食左咁多年。

今日就比較特別,大多都係送工廠,水路遠d同比較煩,雖然平時都成日上工廠大廈,不過都比較緊張,呢類客都比較多要求,要好留神。重有好得意既係行到半路無啦啦有個細路走埋黎問我有冇人想做茶餐廳頭面,睇佢衣著似乎係對面另一間既,個樣好細個,似初中生,事出突然,真係奇奇怪怪…